خلينى نحلم

[ابو امل]

اهلا بيكم
توّا احنا فى القرن 23 موش هكاّ ؟.. العرب هم أسياد الارض بالامارة ملك بريطانيا العربية العظمى عربى دوريجين وملك امريكا عربى وكلّ الدول ملوكها عرب والطاعة من سكّان الارض والولاء الاّ للعرب .. اش نيه الحكاية ؟ تى ماو نتذكّر انّو فى القرن 21 فمّا محاولات لغزو الفضاء والكواكب وخاصة المريخ ، عاد الدول العظمى لقاو شي آخر الغادى وأرض اخرى وجو آخر ، ايه ، هزّوا شلاgاتهم وملاgاتهم ورحلو للمريخ وحتى من اسرائيل هزوها معاهم ماو خافوا عليها لا يستفردوا بيها العرب ( ياذنوبى حتى وكان قعدت وحدها ) يا سيدى نتذكّر وقتها رحالات منظمة صاروخية ومكوكية شي كبير وهزوا معاهم كل شي حتى قطاطسهم وكلابهم وقتها العباد شاددة الصف للرحيل وهوما يختاروا ، الّى شعرو أصفر ولا بنّى ولا أحمر ولّى عينيه زرق ولا خضر يطلع ، الّى وجهو أكحل ولا شعرو ولاّ عينيه يقعد حتى لو كان عندو الجنسية متاعهم ، الحقيقة هزّوا شويه عرب معاهم عندهم أوصافهم ، قالك هذوكم أصلهم منّا مادام يشبهولنا ، لازم بوهم أصلو قاورى وامهم ولا جدودهم غلطوا مع واحد منا ولا واحد من جدودنا .. ايّا قلنا رحلوا وخلاووها واسعة وعريضة للعرب ، ومن حينك كلات بعضها بين العرب ، ضرب ومضروب شكون ياخذ امريكا وشكون ياخذ المانيا ولا بريطانيا ولا فرانسا وقتها شطر العرب ماتوا فى الحرب ما بيناتهم .. كلّ ايد شدّت أختها وكل ملك شد بلاصتو وكل شعب اختار وين يسكن ، بالنسبة ليّا وبما انى مغروم بالكورة اخترت بلاصة فيها احسن ملعب فى العالم واحسن كورة فى العالم ، اخترت بريطانيا خاصة انو الملك متاعها كان جد جدّو جارنا ، نسيت اسمو اما نتذكّر انو متاع النهر العظيم والجار وصى عليه الرسول والحق هو كان يقبل فينا على خاطر جد جدو كان حبيبنا .. كل شي كيف ما خلاووه ، حتى المنقالة مازالت موجودة والملعب موجود زاده كان الاسم فقط تبدّل من بريطانيا الى أبو طانيا كيف ما تبدلوا أسامى الدول الاخرى كيف امريكا ولاّت أم أريكا .. بما أنى مغروم بالكورة ما نفلّت حتى ماتش وخاصة فى ملعب أم بلدون ( ويمبلدون ) شي كبير ، الدخول بلاش ، بوليسية ما فمّاش ، جمهور يشجّع من غير قباحة ، ملاعبية فنيات كبيرة ومتعة وفرجة ما ريتهاش فى ملاعبية القرن 21 ، الحاصيلو شي كبير أخلاق وفرجة ومتعة من غير سبان ولا تنرفيز ، الفريق الرابح يهنيوه والخاسر يصفقولو ولّى يهز البطولة يضيفوه ويكرموه .... أيا قوم ماعادش بكرى عليك تى ماو طلعت نحلم وعطست فى المرا وقلتلها يا مرا تى علاش تفيّق فيّا ، خليتنى نحلم ..

[ms007]

شكرا يا أخي على هذا الموضوع الممتاز
إنشاء الله يا ربي علاش لا

[MAiZA]

الله غالب هذاكا حال الكرة المحترفة بأتم معنى الكلمة...

و إن شاء الله نراووها في تونس و في البلدان العربية...

[rio007]

علاش لا:cool:

[الجنرال]

اللي عند ربي مش بعيد:p

[POWER HASSANOS]

اهلا بالغالي ابو امل


والله فكيتهالي من فمي

اما انا حلمت حلمة اخرى

تنجم تقول version مبدلة شويا

كيما هكة .....انا في الفيراج ونتفرج وقتها في ماتش نصف نهائي كأس تونس في ستاد رادس

بيني وبينكم فيبالى بروحي وقتها نتفرج مل بيلوز من كثرة النضام الي ريتو وقتها في المدارج

وكان ماجيتش نعرف روحي ما نقدرش على الشاز راو مشا فيبالي وقتها نتفرج مع اعيان البلاد

الحاصل عمري ما ريت ماتش كيف الماتش الى ريتو ليلتها ...

حسب ما نتذكر كان بين لتوال والمكشخة

والجمهور يصفق ويعيط

وانا كل مرة نقول ...هاو توا باش يخمجوها بالكلام الزايد والسب

شىء !!!!!!!

الجمهور يشجع بكل روح رياضية شايخين وعاملين جو الناس الكل

واللعب والفنيات الى ريتها

الحاصل كل بونطو ينسيك فلي قبلو



(اول مرة نرا وقتها بونطوات بلحق موش بونطوات بين الجماهير )

البرتي وصلت 4
2 منا ومن غادي

والجمهور فرحان بالمردود الى قدموه الملاعبية والدخلة والجو اكثر حتى من النتيجة

زادوهم وقت اضافي ومع الدقيقة الاولى

جوار من جمعية يمركي ضد مرماه وتوفى البرتي

الجمهور الكل يصفق وشايخين

وخرجنا الناس الكل مع بعضنا

نحنا مزلنا هكاكة نلقاو جماعة مخلطين بين الجمهور الرابح والخاسر

فيبالى الخاسر يهني في الرابح والرابح يصبر في الخاسر

اذا بيهم تركح البونية بيناتهم وتاكل بعضها حجر وضرب ومضروب

وحتى البوليس جدت علاهم الحكاية

وعلى التلفيتة تدمغني حجرة في راسي !!!!!!
ملفجعة جيت طايح ملفرش على ضهري

وكيف عرفت روحي نحلم فرحت وقلت بيني بين روحي
"دفع الله ما كان اعظم نطيح مافرش ...خير ملي نروح مدموغ من رادس "

سميت بسم الله وشربت شربة ماء

وقلت ....زايد هاذي حتى في الحلمة والله لا تصير

[ابو امل]

هههه يبطى شويه يا حسان ، لا بل مستحيل
سألخص كلّ ما أريد أن أقوله فى واقعة ليست بعيدة عندما قال بن شيخة إحنا العرب وانت عاد كمل الباقى ..
ومع هذا سأظلّ أحلم ولن أكلّ ولن أتوقف عن الحلم
لكن هل يحقّ لنا أن نحلم ؟؟ وهل نبقى نحلم فقط ؟
يحق لنا أن نحلم ونرسم أحلاما كبيرة وصغيرة. تتجلى الأمور في الحلم بأفضل أشكالها وأحلى حللها وبهاء مجدها ويستطيع الإنسان أن يتخلى عن كل شيء ما عدا الأحلام .. يحقّ لنا نحلم فقط لانّه لا أحد يقدر ان يفتكّ منك حلمك أو يوجهّه .. الحلم شيء والواقع المرير الذى عاشوه اجدادنا ونعيشه حاليا نحن من مهّدنا لهذا الواقع سابقا وحاليا ولاحقا والاّ لماذا نتقيّأ عند سماع كلمة عربى نحن عرب ونقولها ، العرب اسم لعناوين عديدة ، التخلف ، الفقر ، الجهل ، العنف ووو ، فى كرة القدم لا تستفزنا الكلمة كثيرا عندما يلفظها أجنبى لكن عندما يقولها عربى !!

[bassemTN]

انما المطالب بالتمني و الصعود الى اللأعلى يبدأ بالدرجة اللأولى و أول المشوار خطوة الى اللأمام تليها خطوات أخرى و نحن في البداية وككل بداية نحلم بالوصول الى المنتهى الى المدينة اللأفلاطنية الفاضلة لنجسد الحلم للواقع يجب المرور بعديد التجارب فيها اللأيجابي وفيها السلبي و تتظافر كل الجهود لتحقيق المبتغى مهما كان ظرفه الزماني أو المكاني للأن عمل اليوم نجني ثماره الغد
:cool::cool::cool:

[abou yassine]

أهلا بالغالي روفة

أردت أن ألومك أخي العزيز لأنك أفقت من هذا الحلم الجميل ، و لكن موش مشكل فالذنب ليس ذنبك و إنما هو ذنب الرواسب الكبيرة التي تركتها تصرفات بعض المرضى ( عاديين كانو أو مسؤولين ) فأخي ليس هناك نتيجة بدون سبب ، و ليس هناك حاضر بدون ماضي ...
فلو نتمعن قليلا نرى بأننا ورثنا إرثا ثقيلا لم تزده الأيام سوى تحجرا و صلابة ، في الوقت الذي كان يجب أن يذوب مثل الجليد عند تعرضه للحرارة ، فقبل الآن لم تكن الجماهير تشاهد الإبداعات الأوروبية و العالمية ،لأنه بكل بساطة لم يكن هناك لا تلفاز و لا أقمار صناعية و لا لاقط و لا أجهزة استقبال حيث تحول العالم إلى قرية صغيرة يمكننا من خلاله أن نعيش المقابلات الممتعة و كأننا في قلب الحدث ، و النتيجة كما ذكرت لك أخي رؤوف : عوض أن نتعلم و ناخذ منهم العديد من الإيجابيات ، انغلقنا أكثر على أنفسنا و تحجرت تصرفاتنا و كأننا لا نستعرف بالعالم الخارجي و لا نؤمن بما يؤمن به ...
خلاصة القول أخي الكريم : العيب فينا كلنا من صغيرنا إلى كبييرنا ، و هي نتيجة طبيعية للرواسب الكثيرة التي ورثناها ، و لكن في الأخير لابد من حل ، أما المشكلة هي : كيف سيكون هذا الحل ، و متى و أين ....

و للحديث بقية

[curva_est]

ان شاء الله.....
:(:(:(:(:(:(:(:(:(:(:(:(:(:(

[sniper_91]

في البداية ماصاب نعيشو هاكة اليوم
كل نفس ذائقة الموت
يعني Impossible تعيش للقرن 23
احلم و ربي معاك

[agr200111]

ياخويا يعطيك الصحة

[yahya le tunsien]

لما لا
انا زادة نحلم

[taha10]

شكرا على هذا المرضوع ومن حقنا ان نحلم ولكن اليقظة في بعض الاحيان تكون عكس الحلم

[CA for ever]

Alors الي يتمنى ولى خير مالي يستنى

[haffed]

ان شاء الله يا معلم

[haffed]

والله غيبتك تي عود طل علينا يا راجل

[dhia23]

علاش لا....ان شاء الله يا خويا

[fares_sat_81]

اللي عند ربي مش بعي

[الذئب الابيض]

عندما يكون سي رؤوف متواجد http://up.arabseyes.com/gif/eie99076.gif.. يكون ل الابداع فنونhttp://up.arabseyes.com/gif/eie99076.gif
ألف شكر على الموضوع الرائع http://up.arabseyes.com/gif/eie99076.gif.. اسف الاقصوصة الرائعةhttp://up.arabseyes.com/gif/eie99076.gif



لا تحلم.. ب اختصار ذلك واقعنا ..!!!
لكن الامل يبقى موجود..

[Moez Idriss]

hathi koura mo7arfa mouch mo7tarfa

[العقيد أبو شهاب]

لا يغير الله قوما حتى يغير ما بأنفسهم

:confused:

[ennouma]

اللي عند ربي مش بعيد

[نوفل الحاج فرج]

اهلا بيكم
توّا احنا فى القرن 23 موش هكاّ ؟.. العرب هم أسياد الارض بالامارة ملك بريطانيا العربية العظمى عربى دوريجين وملك امريكا عربى وكلّ الدول ملوكها عرب والطاعة من سكّان الارض والولاء الاّ للعرب .. اش نيه الحكاية ؟ تى ماو نتذكّر انّو فى القرن 21 فمّا محاولات لغزو الفضاء والكواكب وخاصة المريخ ، عاد الدول العظمى لقاو شي آخر الغادى وأرض اخرى وجو آخر ، ايه ، هزّوا شلاgاتهم وملاgاتهم ورحلو للمريخ وحتى من اسرائيل هزوها معاهم ماو خافوا عليها لا يستفردوا بيها العرب ( ياذنوبى حتى وكان قعدت وحدها ) يا سيدى نتذكّر وقتها رحالات منظمة صاروخية ومكوكية شي كبير وهزوا معاهم كل شي حتى قطاطسهم وكلابهم وقتها العباد شاددة الصف للرحيل وهوما يختاروا ، الّى شعرو أصفر ولا بنّى ولا أحمر ولّى عينيه زرق ولا خضر يطلع ، الّى وجهو أكحل ولا شعرو ولاّ عينيه يقعد حتى لو كان عندو الجنسية متاعهم ، الحقيقة هزّوا شويه عرب معاهم عندهم أوصافهم ، قالك هذوكم أصلهم منّا مادام يشبهولنا ، لازم بوهم أصلو قاورى وامهم ولا جدودهم غلطوا مع واحد منا ولا واحد من جدودنا .. ايّا قلنا رحلوا وخلاووها واسعة وعريضة للعرب ، ومن حينك كلات بعضها بين العرب ، ضرب ومضروب شكون ياخذ امريكا وشكون ياخذ المانيا ولا بريطانيا ولا فرانسا وقتها شطر العرب ماتوا فى الحرب ما بيناتهم .. كلّ ايد شدّت أختها وكل ملك شد بلاصتو وكل شعب اختار وين يسكن ، بالنسبة ليّا وبما انى مغروم بالكورة اخترت بلاصة فيها احسن ملعب فى العالم واحسن كورة فى العالم ، اخترت بريطانيا خاصة انو الملك متاعها كان جد جدّو جارنا ، نسيت اسمو اما نتذكّر انو متاع النهر العظيم والجار وصى عليه الرسول والحق هو كان يقبل فينا على خاطر جد جدو كان حبيبنا .. كل شي كيف ما خلاووه ، حتى المنقالة مازالت موجودة والملعب موجود زاده كان الاسم فقط تبدّل من بريطانيا الى أبو طانيا كيف ما تبدلوا أسامى الدول الاخرى كيف امريكا ولاّت أم أريكا .. بما أنى مغروم بالكورة ما نفلّت حتى ماتش وخاصة فى ملعب أم بلدون ( ويمبلدون ) شي كبير ، الدخول بلاش ، بوليسية ما فمّاش ، جمهور يشجّع من غير قباحة ، ملاعبية فنيات كبيرة ومتعة وفرجة ما ريتهاش فى ملاعبية القرن 21 ، الحاصيلو شي كبير أخلاق وفرجة ومتعة من غير سبان ولا تنرفيز ، الفريق الرابح يهنيوه والخاسر يصفقولو ولّى يهز البطولة يضيفوه ويكرموه .... أيا قوم ماعادش بكرى عليك تى ماو طلعت نحلم وعطست فى المرا وقلتلها يا مرا تى علاش تفيّق فيّا ، خليتنى نحلم ..

يعطيك الصحة خونا أبو أمل عشت شويه فرحة و أنا نقرا في الموضوع ....

موضوع رائع فقد احسنت التخيل